მოდული 1 ელექტრონული კურსის შესავალ ნაწილს წარმოადგენს და მისი მიზანია პირს მიაწოდოს ინფორმაცია პერსონალურ მონაცემთა დაცვასთან დაკავშირებული ძირითადი საკითხების თაობაზე. კერძოდ, რას მოიაზრებს პერსონალურ მონაცემთა დაცვის უფლება, რა არის პერსონალური მონაცემები, „პერსონალურ მონაცემთა დაცვის შესახებ“ კანონის რეგულირებისა და მოქმედების სფერო, მონაცემთა დამუშავების პროცესში გამოყენებული ძირითადი ტერმინები.

მოდული 2 ითვალისწინებს მონაცემთა დამუშავების კანონიერად და სამართლიანად წარმართვისთვის აუცილებელ საკითხს, კერძოდ, როგორც ე.წ ჩვეულებრივი კატეგორიის, ისე განსაკუთრებული კატეგორიის მონაცემების დამუშავების საფუძვლებს, რომლებიც „პერსონალურ მონაცემთა დაცვის შესახებ“ საქართველოს კანონის მე-5 და მე-6 მუხლებითაა გათვალისწინებული.

მოდული 3 მოიცავს ინფორმაციას პერსონალურ მონაცემთა დამუშავების პრინციპების შესახებ, რომლებსაც „პერსონალურ მონაცემთა დაცვის შესახებ“ საქართველოს კანონის მე-4 მუხლი განსაზღვრავს. კერძოდ, მოდულში მიმოხილულია კანონიერების, სამართლიანობისა და გამჭვირვალობის, მიზნის შეზღუდვის, მონაცემთა მინიმიზაციის, მონაცემთა სიზუსტის, შენახვის ვადის შეზღუდვის, უსაფრთხოების დაცვის და ანგარიშვალდებულების პრინციპები.

აღნიშნული ელექტრონული კურსი არასრულწლოვანთა პერსონალური მონაცემების დამუშავებასთან დაკავშირებულ ძირითად საკითხებს შეეხება, როგორიცაა: ბავშვის საუკეთესო ინტერესი, თანხმობა, როგორც არასრულწლოვანი პირის მონაცემთა დამუშავების საფუძველი და მისი კრიტერიუმები. კურსი მოიცავს მონაცემთა დაცვის სხვადასხვა ევროპული საზედამხედველო ორგანოების და ადამიანის უფლებათა ევროპული სასამართლოს პრაქტიკას არასრულწლოვანთა პერსონალურ მონაცემთა დაცვის მიმართულებით.

აღნიშნული ელექტრონული კურსი შეზღუდული შესაძლებლობების მქონე (შშმ) პირთა განსაკუთრებული კატეგორიის მონაცემთა დამუშავების საკითხებზეა ორიენტირებული. იგი ითვალისწინებს მონაცემთა დამუშავების პროცესის აღნიშნულ პირებზე მისადაგების მნიშვნელობას და მათი როგორც მონაცემთა სუბიექტების უფლებების განხორციელებისთვის სათანადო ზომების მიღების აუცილებლობას. კურსი მოიცავს მონაცემთა დაცვის სხვადასხვა ევროპული საზედამხედველო ორგანოების, ევროკავშირის მართლმსაჯულების, ასევე ადამიანის უფლებათა ევროპული სასამართლოს პრაქტიკას აღნიშნულ საკითხთან დაკავშირებით.

აღნიშნული ელექტრონული კურსი ადრეული/სკოლამდელი აღზრდისა და განათლების დაწესებულებებში რეალურ დროში ვიდეომონიტორინგის განხორციელებისას აუცილებლად გასათვალისწინებელ საკითხებს შეეხება, როგორიცაა: ვიდეომონიტორინგის განხორციელების მიზანი, არასრულწლოვანთა დაცვის აღმატებული ინტერესი, მათი კანონიერი წარმომადგენლების თანხმობის აუცილებლობა, მონაცემთა დამუშავების პრინციპები და მონაცემთა უსაფრთხოების უზრუნველყოფასთან დაკავშირებული რეკომენდაციები.